Dómstólarnir eru felags fyri alt ríkið. Føroya rættur er skipaður sum serligt rættardømi í donsku dómstólsskipanini.

Dómar, sagdir av Føroya rætti, kunnu verða skotnir inn fyri Eystara landsrætt, ið hevur sæti í Keypmannahavn. Landsrætturin verður settur í Føroyum nakrar ferðir um árið til at viðgera og siga dóm í apellmálum. Dómar, sagdir av landsrættinum, kunnu undir ávísum treytum verða skotnir inn fyri Hægstarætt, ið somuleiðis hevur sæti í Keypmannahavn.

Serstøk rættargangslóg er galdandi fyri Føroyar. Grundleggjandi reglurnar í føroysku rættargangsskipanini eru tær somu sum í samsvarandi donsku lógini, men frávik eru, har serlig føroysk viðurskifti gera tað neyðugt.